Elísabet Thoroddsen er hinsegin höfundur, oftast með úfið hár og hefur óbilandi áhuga öllu sem viðkemur hinseginleikanum. Hún skrifar handrit, bækur, lagatexta og semur tónlist fyrir hljómsveitirnar sínar Ukulellur og Mamma þín. 

Elísabet er fædd 1981 og býr í Reykjavík þar sem hún ólst upp. Hún lærði kvikmyndagerð í Danmörku og hefur starfað á ýmsum sviðum innan fagsins um árabil og vinnur nú að þróun heimildarmyndar um hljómsveitina Ukulellur sem þegar hefur hlotið athygli á erlendri grundu, meðal annars á kvikmyndahátíðinni Nordisk Panorama.

Elísabet er stofnmeðlimur hljómsveitarinnar Ukulellur og hefur skrifað fjölmarga lagatexta fyrir sveitina sem fluttir hafa verið á hátíðum bæði innan og utan landsteinanna. Textarnir fjalla flestir um lesbískar ástir og raunveruleika miðaldra kvenna. 

Bækurnar um Tinnu, Allt er svart í myrkrinu, Á eftir dimmum skýjum og Undir sjöunda þili hafa slegið í gegn hjá ungmennum um land allt, en fyrsta bókin í seríunni hlaut tilnefningu til Íslensku bókmenntaverðlaunanna og Barnabókaverðlauna Reykjavíkur. Árið 2025 kom út bókin, Rugluskógur, en hún er fyrir krakka á aldrinum 4 - 12 ára. Nýjasta bókin Lesbíur óskast kemur út í nóvember 2026 og er skáldsaga fyrir fullorðna.